Portyè dèbantchi ache rido tyè chin. Omo dè rèthèta, k’amâvè cha têra, cha famiye, chon tsalè, chon tropi.
La poya è lè rindyè, iran po li chè dzoua dè fithè. Chon tropi, inchenayi è botyatâ, n’in d’irè fyê.
Kan trintchivè chon bon grevire, chon vatsèrin è chè motètè, dou tin ke le lathi ch’ètsoudâvè, on piti dyètsè dè hyà fretse è èpècha no faji pâ a pouêre.
D’outon i chavi kanmimo chè fére kotyè pyéji, di chayêtè avu lè karant’è trè.
Ma, chin k’amâvè le mi, irè le Tyrol è chè kothemè, l’a mimamin tsantâ din on kavô yô l’avi bayi lè j’èfrethon a to le mondo.
Chin oubyâ di viyo moujiron, in chaptanbre, le dechando no montâvan tantyè i Marindè po pachâ na bouna vèya avu lè j’èmi.
Le dèvêlené dèvan dè medji na bouna fondya, no j’alâvan tantyè i Mortey, yô lè tsamo no fajan fitha. Chè dèmorâvan in chè dzubyin chu lè piti takon dè nê ke chobrâvan din lè koya.
Apri to chin, ou hyâ dè lena, irè lè bouketin k’on vêyê chu la fritha dou Vani. Avu lou grantè kouârnè, no chinbyâvè k’alâvan pèrhyi la yê è pekâ kotyè j’èthêlè.
Na djijanna d’an t’â dzuyê le tèâtro avu lè Takounè. Chi tèâtro ! On dzouyo dè la ya dè dèvejâ le lingâdzo dè nouthrè j’anhyan.
No j’iran ouna kobya dè vretâbyo j’êmi Apri to chin, la ya l’è chovin tru kourta, chuto kan on chè krê in bouna chindâ.
Du kotyè tin, la Chètse l’avi adzetâ na remache nàvoua po fére la putha din lè ran di karant’è trè.
Pyin dè pochyin avu cha chindâ, le kà le tsekanyivè prà.
Ma, l’oura ch’è abadâye. La Granta-Chètse l’avi bin rèkordâ chon rôle è, irè chu le lindâ dè ta pouârta. Chavi prà ke l’oura l’avi dza vèchâ di tsâno portan bin inrachenâ din la têra prèvonda.
La lârenècha l’a j’ou rèjon dè tè, chin ke te puéchè dre arèvêre a nyon.
A ta fèna, a tè j’infan è tè piti j’infan hou dou a trè mo dè ti lè j’êmi k’amâvan tè rinkontrâ, dèvejâ, medji tè bon makaron dè tsalè è bêre kartèta avu tè. I vo prèjinto tota men’amihyâ.
Adyu Zepp!
On di karant’è trè.
Djirâ
Ce contenu provient de notre ancien site web. Il est possible que sa mise en page ne soit pas idéale. En savoir plus
